Tempest

På grunn av stive hamneprisar har vi leita etter ei hamn som ville passe på Tempest for ein litt billegare penge medan vi er heime ein tur. Det har vi funnet, og i dag gjekk vi over til Mayflower Marina. Den er ikkje like beskytta mot ver og vind som Sutton Marina midt i sentrum, men vi tjorar for storm, og håpar hamnevakta gjer som han lova og held eit ekstra auge med skuta vår.

Midt i fortøyinga tikka meldinga vi har venta på ei stund inn på SMS. Vi har forstått at onkel Hjalmar har hatt lyst til å vere mannskap over Biscaya, og no kom påmeldinga! Han ville vere med, og hadde fått klarering frå øvste hold. Det er alltid mykje moro med onkel Hjalmar, så vi gler oss til å få han ombord som ekstra mannskap over “vikja”. Det var utruleg greit å få mannskapsbekymringa ut av hovudet, og sjølv om det er litt surt og kaldt her i England håpar vi han også har tid til å nyte nokre varme dagar med oss på den andre sida. Det einaste som no bekymrar skipparen er om han får behalde rolla si ombord. Onkel Hjalmar har både pipe og skipperlue, og skal det gå etter ansenitet er eg redd vi to brørne endar som fokkeslaskar begge to

Vi handla rask, her skulle han ikkje få angrefrist, så vi heiv oss over flybestillinga med ein gong. Ikkje veit eg om det var tilfeldig, men i det vi trykka på bekreft stig det tre strame karar ombord og banka bestemt på taket. “Hello, Custom!” Vi sto straks i giv akt og presenterte det vi hadde av papir på både mannskap og skute. Dei noterte dei vesentlege detaljane, men verka meir interessert i å prate om kossen vi kunne ha råd til å reise eit heilt år utan å jobbe. Dei verka ikkje heilt framande for tanken sjølve. Dette var første møte med tollvesenet på denne turen, og det gjekk jo fint. Berre ein hyggeleg prat og utveksling av nokre papir, dei var ikkje ein gong inni båten. Vi såg vel ut som kjekke og greie gutar då!

Dagane vi har loge her i Plymouth har vi nytta til anna forefallande arbeid. Vi har snudd ein del av skapa slik at dei opnar seg oppe og ikkje nede, alle som har prøvd å opne eit fullt skap i skarp kryss skjønner tanken bak det! Vi har også oppdatert loggboka som no viser at vi så langt har gått 1.606,2 nautiske mil. Ellers har vi hatt orkesterplass til British Firework Champiionships. Ei heilt fantastisk oppvising som gjekk over to kveldar!

No har vi pakka og gjort klart for heimreise, det gjenstår berre ein siste vask. Må jo ha skuta presentabel no når slekta skal mønstre på! I morgon tidleg hiv vi oss på toget til London, så er vi i heimlandet i løpet av dagen:-)